— metacognition, learning, writing — 1 min read
我會開始寫嘢，有好幾個原因，其中之一，係利用創作文字呢個手段，去學習。
就如你所見，我自認係一個學習者(Learner)。自細細個開始我就對世事充滿好奇心，以前鍾意睇書，大個咗就經常上網Google呢樣嗰樣，乜都想學下。
講個故事俾大家聽：
當年，我間中學係以中三成績去決定你中四至中六，即係DSE，可以揀幾多個選修科嚟讀嘅。
咁如果你考試平均數過到個Cutoff，你就可以揀三科。相反，如果你廢啲嘅，就只能夠揀兩科讀。
好不幸地，小弟當時Below Cutoff少少，揀唔到心儀嘅Physics，心有不忿。
理論上，如果讀得兩科，當啲精英同學上緊第三科嘅堂嗰陣，我哋就要落圖書館自修嘅。
我當時靈機一動，心諗：
依家先學期初，如果每次自修搵人幫手簽到，偷偷地祟入Physics班上堂應該都冇人覺嘅。
如是者，我就偷偷地「添修」咗Physics，上咗幾個禮拜堂，測驗都Take埋，分數仲攞頭幾名添！ 直到有日俾唔記得邊個老師發現咗，先踢返我出嚟。
「鍾意學嘢，鍾意成為萬事通」嘅呢種感覺，由細到大都根深蒂固。
咁同寫嘢有乜關係？
大個咗就發現，剩係靠睇，讀過嘅知識好快就會唔記得。
如果神燈話幫你達成三個願望，乜都得，你會許咩願？
冇錯，我第一下就會同佢講：我想你幫我達成無限個願望。
同樣道理，學所有嘢之前，好應該先學下點樣學習先最有效。
後設認知，又或稱元認知，指嘅係對「思考/認知」嘅「思考/認知」。
好難明？例子：
呢啲問題都屬於後設認知思考嘅範圍。
後設認知知識固然令我哋知道咩為之有效嘅學習法。但，後設認知嘅學問由唔同範疇組成，例如神經系統、情緒、睡眠、意識/潛意識((Sub)-Consciousness)等。深入嘅了解唔止代表更加曉得點學習，更可以研究治療抑鬱、焦慮、認知障礙症等精神疾病。
知道自己係點思考，就可以反省自己嘅本質，從而改變睇呢個世界嘅角度。
呢度唔深入探討咁多住，嚟緊我會寫多啲關於後設認知嘅文章。
攞過諾貝爾物理學獎嘅物理學家Richard Feynman，分享過佢用嚟深入理解概念嘅一套方法學，就係被稱為Feynman Technique嘅學習法。
簡略說明就係：當作你同緊一個小六學生講解你學緊嘅概念，如果你講到一舊舊，咁就代表你自己都唔夠清晰嘞。
"Ce qui se conçoit bien, s'énonce clairement," French writer Boileau (1636–1711)
It could be translated to: "What is clearly thought out is clearly expressed."
寫作，其實就係不斷重複呢個步驟，寫到一舊舊嘅，咁就再溫下書再重寫嗰一部分，從而加固自己嘅知識。呢個現象，心理學家稱之為Generation Effect。
創作自己嘅內容材料，係牢牢記住資訊嘅最佳方法。呢個亦都係Note-taking係好好嘅溫書方式嘅原因。
呢個係我開始寫嘢嘅原因之一。 如果我寫嘅嘢，你會鍾意睇，又或者喺未來幫到你，就更好添啦😇