Choco Chu 朱喬雋

呢幾年嚟，每日下晝三點鐘準時，無論身處何方，我都會打開電腦或手機嘅Chrome，喺條網址bar度鍵入 producthunt.com，然後㩒Enter。

做呢件事嘅唔止我一個。仲有來自世界各地，數以萬計嘅科技熱衷者。

香港時間下午三點，代表太平洋時間午夜十二點，踏入新嘅一日。而Product Hunt呢個網站，亦喺呢個時間更新，展示科技界最新最熱嘅產品。

等我由Product Hunt嘅故事講起。

由微型實驗，到千萬企業

喺2013年嘅十一月，一位兼職產品經理Ryan Hoover，發掘得意嘅科技產品係佢日常嘅興趣。佢苦惱地發現冇一個地方俾佢「尋寶」，同朋友分享自己搵到嘅正嘢。於是佢決定做個小小嘅實驗 - 整張叫Product Hunt嘅email list，朋友見到有趣嘅產品就Send俾佢，而Ryan再整合，用一個叫Linkydink嘅工具定期以Email嘅方式發送俾訂閱者。

科技人都鍾意新事物。透過Twitter同Quibb（已結業）上嘅Tech友口耳相傳，好快已經有將幾百人訂閱呢封Email。啲人亦好踴躍地將佢哋鍾意嘅產品投稿到Product Hunt。呢封Email成為咗一時熱話，大家每日都期待呢封電郵到達自己嘅收件箱，睇下有咩新奇嘅產品。

Product Hunt本來只係Ryan得閒整出嚟嘅Side Project。但去到呢個moment，Ryan Hoover好清楚呢件事嘅潛力遠比佢想像中大，於是佢搵埋朋友Nathan Bashaw，喺美國感恩節假期花咗五日，整咗個簡單嘅網站出嚟，就變成今日Product Hunt嘅雛形。

就好似高登/連登咁，用戶可以投票俾佢哋鍾意嘅產品。

只係短短三個星期，呢個網站嘅活躍用戶已嘅達到2000位。之後半年，媒體同投資者蜂擁而至，連全球最出名嘅初創加速器Y Combinator都罕有地主動邀請PH加入。呢間未成立夠一歲嘅公司，成功獲得由a16z創投引領嘅六百一十萬美元A輪投資。

八年以嚟，Product Hunt建立咗全球最大嘅科技產品愛好者社群。無數嘅人喺PH搵到改變佢未來嘅產品，更多科技公司同開發者亦因為PH，令自己產品發揚光大、甚至一夜成名。

喺Product Hunt嘅成功身上，我哋又學到啲咩呢？

善用人嘅心理

PH嘅上癮性，源自你我都有嘅好奇心。瀏覽新產品，帶嚟大腦釋放多巴胺（dopamine）嗰種暢快感，令人形成每日都要做嘅習慣。（最近裝咗隻Block Distraction嘅app，當中佢預設封鎖嘅網站除咗Facebook、Twitter、YouTube等之外，就係PH，可見Tech友有幾上癮哈哈）

Ryan Hoover之後就同暢銷書作者Nir Eyal合作，寫咗本書叫《Hooked: How to Build Habit-Forming Product》講述點樣製造令人上癮嘅產品。

零成本都可以創業

Ryan Hoover創立Product Hunt嘅第一版本，即係張email list嗰陣只係用咗佢20分鐘，更加一蚊成本都唔使，直至佢發現呢個諗頭有人buy，充滿市場潛力先搵朋友寫網站搞大佢。喺初創嘅世界，我哋有新idea，唔會一嚟就整到靚靚仔仔，而係製作成最簡陋但用得嘅嘅版本，以測試係咪有市場。呢個概念叫做「最低可行產品（Minimum Viable Product）」，簡稱MVP，由《The Lean Startup》作者Eric Ries發揚光大。

製作MVP時，我哋希望用最少嘅成本測試市場反應，咁樣失敗都唔怕肉痛。今時今日，視乎產品嘅類別，MVP嘅要求都有所提升。但相對地，冇開發經驗嘅人學習整網站整app，都比以前更容易。用wordpress左砌右砌、搵個識coding嘅拍檔、或者學用nocode工具等種種方法，任何人都有能力整個MVP出嚟。

圍繞產品嘅社群同文化

Product Hunt係典型嘅網絡效應（network effects）型平台，愈多人用PH，PH呢個平台嘅價值就愈大。所有面向使用者嘅產品，要做得好，經營好使用者社群係最重要嘅一環。PH喺呢方面係出色嘅例子。

PH稱產品開發者為Makers，照顧Maker呢方面，PH特意整咗個Makers嘅社交群組，俾嚟自各地嘅開發者傾吓產品經，分享佢哋嘅目標同開發進度。而好似你我呢啲科技愛好者方面，PH有個討論區定期會有產品相關嘅問題，然後用家就可以討論，或互相介紹產品。

當建立咗活躍嘅社群後，品牌就會變成文化。2014開始，PH每年都會招募線下聚會搞手，由用戶自薦，舉辦位於唔同城市嘅活動，俾PH圈子嘅產品愛好者聚首一堂，仲記得當年香港都有份，可惜近年都唔見有人搞了。最近，PH仲推出咗品牌T-Shirt，作為長年粉絲嘅我當然捧場啦！

結語

Product Hunt由簡單嘅idea零成本起家，到今日成為造就無數人成功嘅平台。
以小博大，改變世界；呢樣嘢正正係初創嘅吸引之處。